Zbuluar 10 ton kokainë në Spanjë, vlera e saj do të kalonte 100 milionë euro

Garda Civile është nën hetimin për përfshirjen e mundshme të një organizate me origjinë shqiptare në magazinimin e drogës, e cila ishte shpërndarë në dy kapanona në zonën industriale El Labradorcico.

Sasia e kokainës së zbuluar në Aguilas mund të kthehet në një nga sasi të mëdha të sekuestruara në historinë e Spanjës. Sasia e drogës së magazinuar në dy kapanona industriale në zonën industriale El Labradorcico vlerësohet se mund të arrijë deri në dhjetë tonë, megjithëse numërimi përfundimtar ende nuk kishte përfunduar.

Vlera e saj në tregun e zi do të kalonte ndjeshëm 100 milionë euro. Zbulimi u bë të premten, më 30 tetor.

Hetimi i nisur nga Garda Civile po përpiqet të zbulojë se kush fshihet pas magazinimit të saj dhe nga vjen kjo ngarkesa me përmasa kaq të madhe. Hetimet e para tregojnë se droga mund të përkasë një organizate kriminale me origjinë shqiptare, e cila dyshohet se i ka përdorur ambientet, që nuk kishin asnjë tabelë apo shenjë identifikuese të ndonjë kompanie, si magazina për pergatitjen e shpërndarjes së saj.

Në kapanonin e parë ishin numëruar tashmë më shumë se 5.000 kilogramë kokainë, ndërsa zbulimi i një ambienti të dytë, gjithashtu i mbushur me drogë, e çoi vlerësimin në rreth dhjetë ton. Sasia e sekuestruar është shumë e madhe se ajo e 5.000 kilogramëve kokainë të sekuestruar nga Policia Kombëtare në muajin prill në bregdetin e Huelvës.

Nëse konfirmohet vlerësimi fillestar, ngarkesa e Aguilas do të kalonte ndjeshëm vlerën prej 100 milionë eurosh. Cmimi i kokainës në Spanjë aktualisht luhatet nga 13.000 deri në 14.500 euro për kilogram, sipas të dhënave të konsultuara, që do ta vendoste vlerën e dhjetë tonëve nga 130 deri në 145 milionë euro.

Zbulimi u bë rastësisht. Sasia e drogës doli në pah pasi një paletë e ngarkuar me drogë ra nga një pirun ngritës gjatë punimeve për zhvendosjen e saj.

Përplasja shkaktoi demtimin e një pjesë të ngarkesës dhe shpërndarjen e disa pakove me kokainë nëpër kapanon. Punëtorët që ndodheshin brenda u larguan me shpejtësi nga vendi, duke e lënë pirunin ngritës të braktisur. Kur mbërriti Policia Bashkiake, e njoftuar për një aksident të mundshëm në punë, në ambientet e magazinës nuk ndodhej askush. Deri më tani, nuk ka persona të arrestuar.

Gjatë kontrollit u zbulua se paletat e magazinuara përbanin pakët me kokainë. Në njërin prej kapanonave u gjetën nga 300 deri në 400 paleta të magazinuara. Pas këtij zbulimi, Garda Civile mori përsipër hetimin dhe lokalizoi një kapanon të dytë industrial në të njëjtin zonë industriale. Agjentët vazhdonin edhe këtë të diel nxjerrjen e drogës dhe verifikimin e peshës së ngarkesës.

Vlerësimet e para tregojnë se kokaina mund të jetë shpërndarë me rrugë tokësore drejt pikave të ndryshme të Spanjës dhe vendeve të tjera evropiane. Ekzistenca e dy magazinave dhe vëllimi i drogës së sekuestruar tregojnë për një rrjet të aftë për të transportuar sasi të mëdha malli.