Shtetet e Bashkuara nuk planifikojnë të rifillojnë sulmet ndaj Iranit pas zgjedhjeve të mesit të mandatit

Presidenti amerikan Donald Trump ka deklaruar se Shtetet e Bashkuara nuk planifikojnë të rifillojnë sulmet ndaj Iranit pas zgjedhjeve të mesit të mandatit, të njohura si Midterm. Edhe përkundër agjencisë shtetërore të lajmeve, IRNA, që raportoi se forcat amerikane kanë ndërmarrë disa sulme ndaj ishullit iranian Qeshm, në Ngushticën e Hormuzit, zyrtarët amerikanë i përshkruan goditjet si të kufizuara dhe thanë se ato ishin një përgjigje ndaj të shtënave të Gardës Revolucionare Islamike të Iranit kundër një avioni amerikan. Edhe nga Teherani sakaq, mbërrijnë sinjale për vullnet të mirë për të punuar drejt një zgjidhjeje diplomatike të konfliktit. Presidenti iranian Masoud Pezeshkian ka bërë të ditur se vendi po përpiqet të zgjidhë situatën përmes dialogut, ndërsa Udhëheqësi Suprem, Mojtaba Khamenei, i ka dhënë qeverisë kompetencat e nevojshme për të zhvilluar negociatat. Këto zhvillime patën ndikim të menjëhershëm në tregjet ndërkombëtare. Çmimi i naftës Brent ra me mbi 7 për qind, duke zbritur në rreth 105 dollarë për fuçi, ndërsa nafta amerikane WTI pësoi dhe ajo një rënie të ngjashme. Rënie të ndjeshme shënoi edhe çmimi i gazit në Europë. Trump pretendoi se rënia e çmimit të naftës lidhet me pritshmëritë për shmangien e një lufte të re me Iranin, duke shtuar se Teherani dëshiron të arrijë një marrëveshje sa më shpejt. Edhe përkundër situatës në terren që mbetet e paqartë, shoresat për rifillimin e negociatave kanë ndikuar pozitivisht në bursat europiane dhe amerikane, duke rritur optimizmin e investitorëve lidhur me një ulje të mundshme të tensioneve në rajon.