Tragjedia në futbollin spanjoll: Përplasi për vdekje sulmuesin, çfarë bëri më pas portieri 25-vjeçar?

Një ngjarje tragjike ka tronditur futbollin spanjoll, pasi sulmuesi Jesus de Miguel, 30 vjeç, ndërroi jetë mëngjesin e së martës, pas një përplasjejeje të rëndë me portierin Jesus Owono gjatë ndeshjes mes Tenerife dhe FC Andorra.

Ngjarja ndodhi të hënën, në minutat e fundit të takimit të vlefshëm për Segunda Division. Portieri 25-vjeçar i Andorrës doli nga porta për të larguar një top të gjatë, por në ndërhyrje gjuri i tij goditi kokën dhe kraharorin e De Miguelit.

Futbollisti mbeti i palëvizur në fushë, ndërsa disa prej lojtarëve nuk i mbajtën dot lotët. Ndeshja u ndërpre dhe më pas u braktis përfundimisht nga arbitri, i cili i tregoi kartonin e kuq të drejtpërdrejtë Owono-s.

Sipas raportimeve të mediave spanjolle, De Miguel pësoi arrest kardiak gjatë transportimit drejt spitalit, ku u arrit të rikthehej në jetë nga ekipet mjekësore. Ai u shtrua në repartin e kujdesit intensiv dhe fillimisht gjendja e tij u përshkrua si “e qëndrueshme, por e rëndë”.

Megjithatë, gjendja shëndetësore e sulmuesit u përkeqësua dhe ai ndërroi jetë mëngjesin e së martës.

Sipas raportimeve të mediave, portieri Jesus Owono ishte i shkatërruar psikologjikisht pas incidentit. Ai thuhet se ka shpërthyer në lot dhe është parë duke u lutur në dhomat e zhveshjes.

Futbollistët e Andorrës, gjatë kthimit nga Tenerife, kanë shprehur shqetësim të madh për gjendjen emocionale të portierit, i cili ishte dukshëm i tronditur.

Personat pranë tij e përshkruajnë Owono-n si një njeri të kujdesshëm dhe shumë të sjellshëm, duke theksuar se ndërhyrja nuk kishte asnjë qëllim të keq.

Gazetari Ivan Alvarez raportoi për radion COPE se portieri kishte pasur ndërmend t’i kërkonte personalisht falje familjes së De Miguelit, përpara se të mësonte për vdekjen e tij.

Autoritetet gjyqësore në Ishujt Kanarie kanë konfirmuar se do të hapet një hetim për vdekjen e futbollistit.

Një burim nga gjykata e ka cilësuar ngjarjen si një “përplasje aksidentale në fushën e lojës”. Megjithatë, sipas procedurave ligjore në Spanjë, çdo vdekje që nuk vjen nga shkaqe natyrore i nënshtrohet automatikisht një hetimi gjyqësor.

Owono pritet të mos përballet me masa penale, por mund të ketë pasoja disiplinore sportive. Deri tani nuk është bërë e ditur nëse familjarët e futbollistit do të kërkojnë ndjekje penale ndaj portierit.

Partnerja e De Miguelit, Maria, dhe vajza e tyre njëvjeçare, Carla, raportohet se ndodheshin në stadium në momentin e tragjedisë.

Klubi Tenerife ka shprehur dhimbjen e thellë për humbjen e futbollistit, duke deklaruar: “Jemi të shkatërruar. Nuk ka absolutisht asgjë që mund ta lehtësojë këtë trishtim të jashtëzakonshëm.”

Edhe FC Andorra ka publikuar një mesazh ngushëllimi për familjen, shokët e skuadrës dhe miqtë e De Miguelit.

Ndërkohë, ish-mbrojtësi i Barcelonës dhe pronari i Andorrës, Gerard Pique, shkroi: “Më vjen keq me gjithë shpirt. Pusho në paqe, Jesus.”