"Berisha: PD nuk tërhiqet nga protesta, synon front të bashkuar opozitar për zgjedhjet lokale"

Kryetari i Partisë Demokratike, Sali Berisha, ka deklaruar se opozita nuk do të tërhiqet nga protestat kundër qeverisë së Edi Ramës. Ai ka kërkuar që mobilizimi qytetar dhe angazhimi i të rinjve të shndërrohen në një forcë të qëndrueshme politike.

Gjatë një takimi të zhvilluar në selinë e PD-së me grupet e punës së qarkut Tiranë, Berisha diskutoi vijimin e aksionit opozitar, organizimin e protestave dhe përgatitjet për zgjedhjet e ardhshme lokale. Ai theksoi se protestat mbeten një prej instrumenteve kryesore të presionit politik dhe qytetar ndaj qeverisë, ndërsa objektivi i opozitës është krijimi i kushteve për ndryshimin politik në vend.

Paralelisht me aksionin opozitar, kreu i PD-së kërkoi që strukturat e partisë të nisin përgatitjet për zgjedhjet lokale, duke vënë theksin te organizimi në terren dhe forcimi i pranisë së demokratëve në të gjithë vendin. Një tjetër çështje e diskutuar ishte bashkimi i forcave politike dhe shoqërore kundër qeverisë. Berisha u shpreh se opozita duhet të punojë për krijimin e një fronti të përbashkët. "Shpresojmë të ngremë një front të përbashkët në interes të vendit", deklaroi ai.