Berisha: Opozita është shumicë në Tiranë dhe në Shqipëri, duhet të bashkohet në një front të përbashkët

Kreu i Partisë Demokratike, Sali Berisha, ka bërë thirrje për bashkimin e të gjitha forcave opozitare në një front të përbashkët kundër qeverisë së Edi Ramës. Berisha deklaroi se opozita është shumicë në Tiranë dhe në Shqipëri, dhe theksoi se PD-ja duhet të marrë rolin drejtues në përpjekjet për zgjerimin e këtij fronti politik.

“Opozita në fakt sot është shumicë në Tiranë dhe ju garantoj që është shumicë në Shqipëri. Por në këtë mbledhje, mesazhi im kryesor për ju është që do bëni çdo përpjekje në rrethet tuaja, në qytetet tuaja, në qarqet tuaja për një front sa më të gjerë antinarkoshtet. Është koha të bëjmë çdo përpjekje për t’u bashkuar me të gjithë ata që konsiderojnë Edi Ramën të keqen më të madhe të këtij vendi. Ne jemi sot forca kryesore politike e vendit. Na përket ne. Ne jemi sot forcë kryesore politike e vendit, ndaj dhe na përket ne të shtrijmë dorën, të vendosim urat e bashkëpunimit me të gjithë spektrin opozitar në çdo qark, në çdo rreth, në çdo qytet dhe kudo”, tha Berisha.

Berisha theksoi se opozita duhet të bashkohet në një front të përbashkët për të mundur qeverinë e Edi Ramës. Ai përmendi se flamingot e kishin kapur për fyti dhe nuk kishin zë, por tani nuk mund të mohohet që flamingot patën një jehonë të jashtëzakonshme dhe i treguan botës se Edi Rama është një diktator, është një hajdut, është një mashtrues.

Berisha gjithashtu përmendi lëvizjen studentore dhe theksoi se Partia Demokratike dhe demokratët kanë një meritë të veçantë, që në orën e parë u bashkuan me këtë lëvizje, me parimin: mbështetje të plotë dhe totale dhe mbrojtje të studentëve. Ai tha se lëvizja studentore ishte lëvizja e guximtarëve dhe trimave të paparë gjer sot në rrugë dhe sheshet e Tiranës.