Rama nuk heq dorë nga dialogu me studentët, përsërit ftesën për Sofra e Gurtë

Kryeministri Edi Rama ka përsëritur edhe një herë ftesën drejtuar studentëve protestues për t’u ulur në dialog me qeverinë. Përpara godinës së Kryeministrisë është vendosur sërish “Sofra e Gurtë”, mbi të cilën janë vendosur letra me mbishkrimin “DIALOG”. Kreu i qeverisë ka ndarë pamjet e sofrës në rrjetet sociale, duke i shoqëruar me mesazhin “Mirëmëngjes”, ndërsa u ka bërë thirrje studentëve të pranojnë ftesën për bisedime. Rama ka shprehur vazhdimisht gatishmërinë për të dëgjuar shqetësimet e studentëve dhe pedagogëve, si dhe për të shqyrtuar propozimet e tyre lidhur me problematikat e ngritura. Megjithatë, deri më tani, protestuesit nuk e kanë pranuar ftesën e kryeministrit, duke këmbëngulur në kërkesën për dorëheqjen e tij.