Grevë mbarëkombëtare në Francë: Punëtorët, studentët dhe pensionistët në rrugë

Franca do të përballet me një grevë mbarëkombëtare më 5 nëntor, ku pritet të marrin pjesë punonjës të sektorit publik dhe privat, pensionistë, nxënës dhe studentë. Sindikatat kanë thirrur protestat kundër rritjes së kostos së jetesës dhe kërkojnë rritje pagash dhe rishikimin e planit buxhetor të qeverisë për vitin 2027.

Mobilizimi vjen në një klimë të tensionuar sociale, pasi organizatat sindikale kanë shprehur pakënaqësinë për rezultatet e takimit me përfaqësuesit e qeverisë, të zhvilluar më 21 tetor. Sekretari i përgjithshëm i CGT-së, Sophie Binet, deklaroi se sindikatat duan dy gjëra: rritje të pagave kudo dhe një rishikim të planit buxhetor të qeverisë, i cili, siç është sot, është katastrofik për vendin.

Aleanca ndërsindikale ka paraqitur shtatë kërkesa kryesore, ku prioritet mbetet rritja e pagave në të gjithë sektorët. Kërkesat përfshijnë nisjen e menjëhershme të negociatave për pagat në kompani dhe sektorë të ndryshëm, garantimin e pagës së barabartë për burrat dhe gratë, si dhe rritjen e përfitimeve sociale.

Përveç pagave dhe sigurimeve shoqërore, organizatat e punës kërkojnë ndryshime në politikën fiskale dhe mënyrën e shpërndarjes së fondeve publike. Ata propozojnë masa për drejtësi tatimore, përmes taksimit më të lartë të pronës, trashëgimive dhe dividentëve, si dhe rishikimin e ndihmës financiare që përfitojnë bizneset.

Një prej çështjeve të ngritura është shuma prej 211 miliardë eurosh që bizneset kanë marrë në formën e mbështetjes shtetërore gjatë vitit 2023. Sindikatat kërkojnë vlerësimin e kësaj ndihme, vendosjen e kushteve konkrete për përfitimin e saj dhe rishpërndarjen e fondeve të disponueshme.

Në grevën mbarëkombëtare do të marrin pjesë edhe organizata nga sektorë të ndryshëm, të cilat krahas kërkesave të përbashkëta kanë paraqitur edhe shqetësimet e tyre specifike. Në arsim, sindikata Snes-FSU kërkon rritjen e financimit për sistemin kombëtar arsimor dhe shfuqizimin e reformave të shkollave të mesme, të prezantuara në vitin 2018 nga ish-ministri i Arsimit, Jean-Michel Blanquer.