Komisioni Europian vlerëson progresin e Shqipërisë në përafrimin e legjislacionit për biznesin dhe shoqëritë tregtare

Komisioni Europian ka vlerësuar pozitivisht progresin e Shqipërisë në përafrimin e legjislacionit për biznesin dhe shoqëritë tregtare. Shqipëria është klasifikuar me nivel të mirë përgatitjeje në Kapitullin 6 dhe ka shënuar progres të mirë në miratimin e ligjeve që rregullojnë veprimtarinë e shoqërive tregtare, regjistrimin e biznesit, transparencën financiare dhe auditimin.

Ndryshimet në regjistrimin e biznesit dhe shoqëritë tregtare janë pjesë e progresit të evidentuar në raportin e vitit 2026. Këto ndryshime synojnë përafrimin me direktivat e Bashkimit Europian për të drejtën e shoqërive tregtare, duke përfshirë rregullat për bashkimet, ndarjet dhe transformimet ndërkufitare të kompanive.

Miratimi i paketës ligjore që synon përafrimin e plotë me legjislacionin europian të shoqërive tregtare është një tjetër zhvillim i vlerësuar pozitivisht. Kjo paketë përfshin dispozitat për grupimet europiane të interesit ekonomik, shoqëritë kooperative europiane dhe statutin e shoqërisë europiane.

Raporti vlerëson gjithashtu përparimin në përafrimin e legjislacionit për kontabilitetin, raportimin financiar, transparencën dhe auditimin ligjor. Shqipëria ka miratuar ligjin për kërkesat e transparencës dhe ndryshimet në ligjin për kontabilitetin dhe pasqyrat financiare, me synimin për t’i afruar këto rregulla me kërkesat e Bashkimit Europian.

Objektivi i radhës është lidhja e Regjistrit Tregtar me sistemin europian. Komisioni Europian thekson se Shqipëria duhet të vijojë punën për avancimin me digjitalizimin e procedurave të biznesit dhe të përmirësojë procedurat online dhe përdorimin e nënshkrimeve elektronike.