Zelensky: Ukraina duhet të përshtatet me realitetin e ri politik në SHBA

Presidenti ukrainas, Volodymyr Zelensky, deklaroi se Ukraina duhet të përshtatet me realitetet e reja politike në Shtetet e Bashkuara të Amerikës, në mënyrë që të forcojë dialogun me Uashingtonin dhe të sigurojë mbështetjen e nevojshme ushtarake. Ai theksoi se Kievi duhet të ndërtojë marrëdhënie më të forta me të dyja partitë kryesore amerikane, duke marrë parasysh ndryshimet në skenën politike të SHBA-së.

Zelensky tha se Ukraina duhet të forcojë dialogun me Uashingtonin për të rritur ndihmën amerikane dhe të rikuperuar rreth 16 miliardë dollarëve ndihmë, të cilat, sipas tij, SHBA-ja kishte premtuar, por nuk i kishte dorëzuar. Ai gjithashtu kërkoi sigurimin e furnizimeve me raketa për sistemet amerikane të mbrojtjes ajrore Patriot, të cilat mbeten prioriteti kryesor për Ukrainën.

Departamenti Amerikan i Shtetit njoftoi javën e kaluar miratimin e shitjes së 500 raketave Patriot PAC-3 për Ukrainën, me një vlerë të vlerësuar prej 2.1 miliardë dollarësh. Megjithatë, dorëzimi i tyre nuk pritet të realizohet deri në fillim të viteve 2030.

Zelensky bëri të ditur gjithashtu se po punon për të garantuar që Ukraina të ketë një numër të mjaftueshëm avionësh luftarakë F-16 në gjendje pune gjatë pesë deri në gjashtë muajve të ardhshëm. Presidenti ukrainas paralajmëroi se vendi po përballet me një tjetër dimër të vështirë për shkak të sulmeve ruse ndaj sektorit energjetik. Sipas tij, situata në kryeqytetin Kiev është më problematikja.

Ndërkohë, përfaqësues të Bashkimit Evropian, NATO-s dhe Shteteve të Bashkuara janë duke diskutuar në Bruksel propozime për garancitë e sigurisë që do të zbatoheshin pas përfundimit të konfliktit. Zelensky tha se në këto diskutime është shënuar njëfarë përparimi.