Elektriçist i vdekur në Dibër, një tjetër vdekje në një muaj pas Vlorës

Një 60-vjeçar ka humbur jetën në spital, pasi u zu poshtë nga një shtyllë elektrike gjatë punimeve për vendosjen e saj në fshatin Vasie, Dibër. Ngjarja ndodhi më 5 nëntor, rreth orës 11:45. Sipas informacionit paraprak të policisë, shtetasi L. Sh., me profesion elektriçist, dyshohet se ishte duke kryer punime për vendosjen e një shtylle elektrike, kur ajo u rrëzua dhe e zuri poshtë. Si pasojë e dëmtimeve të marra, 60-vjeçari ndërroi jetë në spital. Është proceduar penalisht në gjendje të lirë përgjegjësi i nënstacionit elektrik në Fushë-Alie të Dibrës. Sipas njoftimit të policisë, shtetasi B. D., 59 vjeç, banues në fshatin Renx, akuzohet për veprën penale “Shkelja e rregullave të mbrojtjes në punë”. Policia vijon hetimet për dokumentimin e plotë të rrethanave të ngjarjes.