Veliaj publikon videon me AI: "Në Hënë po të duan të më internojnë, unë do t’u qëndroj besnik prioriteteve të mia"

Kryebashkiaku i Tiranës, Erion Veliaj, ka njoftuar miratimin e projekteve për ndërtimin e 15 çerdheve dhe kopshteve të reja në kryeqytet, ndërsa ndodhet në paraburgim prej 20 muajsh. Në reagimin e tij, Veliaj përmend edhe pretendimet për largimin antikushtetues nga detyra, transferimin nga një qeli në tjetrën dhe kërcënimet që, sipas tij, ka marrë gjatë qëndrimit në paraburgim. “Pasi më rrëmbyen nga zyra e Kryetarit të Bashkisë me letra anonime, pasi tentuan të më shkarkonin nga detyra në mënyrë antikushtetuese, pasi e bënë çorbë menaxhimin e Tiranës, pasi më persekutojnë dhe më mbajnë në paraburgim politik prej 20 muajsh, në një ping-pong gjykatash, pasi më rrëmbyen për të më ndërruar birucën pa një shkresë te vetme dhe pasi më kërcënuan edhe aty, përsëri sot miratova projektet për 15 çerdhe dhe kopshte të reja për fëmijët e Tiranës! Me këto projekte, numri i çerdheve dhe kopshteve të ndërtuara apo të projektuara gjatë administrimit tim arrin në 130! Jo në Durrës e Fier, por edhe në Hënë po të duan të më internojnë, unë do t’u qëndroj besnik prioriteteve të mia!”, tha Veliaj.