"Berisha: Ata që krijuan incidentet në protestën e së shtunës ishin të paguar, jo studentë"

Sali Berisha ka reaguar në një bashkëbisedim me ndjekësit e tij në rrjetet sociale, duke pretenduar se ata që krijuan incidente ishin të paguar nga qeveria dhe jo studentë. Ai shtoi se PD do të vazhdojë të marrë pjesë në protestë.

"Siç e patë ju, asnjë incident nuk pati nga studentët. Zero incidente. Unë mund të them ty, i kam dhe emrat e tyre. Dhe mund t’ua them, por vetëm për hir të asaj që s’po më duket e drejtë se do ta marrin si një sulm të egër personal, por absolutisht ata ishin që të gjithë të paguar fort për të provokuar dhe për të krijuar incidente," tha Berisha.

Berisha shtoi se në qoftë se e vutë re, pikërisht aty ku u krijuan ato dy-tre, ndodheshin si për çudi mediat e qeverisë që t’i filmonin. Ai pretendoi se ata që krijuan incidente nuk ishin studentë, por persona që kishin moshë të ndryshme dhe nuk kishin asgjë të përbashkët me studentët.

"Janë persona që ka prej tyre dhe 40-50 vjeç, ka të tjerë 30-vjeçarë me radhë, kështu që s’kanë asgjë të përbashkët me studentët," tha Berisha.

Berisha shtoi se PD do të vazhdojë të marrë pjesë në protestë dhe se do të mbështesë studentët. "Kemi lindur në protestë dhe do të jemi në këtë protestë. Jo me simbolet tona, në respekt të studentëve dhe pluralitetit të tyre, por në mbështetje të plotë," tha Berisha.