Polonia hap hetim për sulmin me armë zjarri në Krakov
Autoritetet polake kanë hapur një hetim për sulmin me armë zjarri në sheshin kryesor të Krakovit, ku humbën jetën gjashtë persona dhe u plagosën 17 të tjerë. Autoritetet dyshojnë se sulmi është kryer nga një 24-vjeçar që ishte i frymëzuar nga ideologjitë e ekstremit të djathtë.
Sulmi ndodhi pasditen e shtunës, kur një shtetas polak, i veshur me uniformë të stilit ushtarak dhe jelek antiplumb, hyri me automjet në sheshin e mbushur me turistë në qendrën historike të qytetit. Ai nisi të qëllonte në mënyrë të rastësishme ndaj njerëzve, ndërsa lëvizte me shpejtësi nëpër shesh.
Gjashtë viktimat janë katër gra dhe dy burra, mes tyre një shtetas britanik dhe tre viktima të tjera janë gra polake. Nga 17 të plagosurit, pesë janë shtetas të huaj nga Britania e Madhe, Austria, Gjermania, Portugalia dhe Rusia. Dy efektivë policie janë ndër të plagosurit, njëri prej të cilëve ndodhet në gjendje të rëndë.
Autori u ndalua pas një shkëmbimi zjarri me policinë dhe u nënshtrua një ndërhyrjeje kirurgjikale. Ai po mbahet nën ruajtje të rreptë në spital. Një tjetër zhvillim tronditës u regjistrua pas sulmit, kur në banesën e 24-vjeçarit u gjetën të pajetë tre familjarët e tij, të cilët dyshohet se kanë humbur jetën nga plagët e shkaktuara me armë zjarri.
Prokuroria Kombëtare ka nisur hetime për vrasjen e gjashtë personave me armë zjarri dhe tentativën e vrasjes së shumë të tjerëve, përfshirë efektivë policie. Ngjarja po trajtohet si vepër terroriste. Ministri i Brendshëm, Marcin Kierwiński, ka deklaruar se i riu kishte shfaqur interes për ideologjitë e ekstremit të djathtë dhe mbante bindje radikale e ultranacionaliste.
Sulmi ka tronditur Poloni, një vend që deri më tani konsiderohej ndër shtetet më të sigurta të Europës. Ngjarja ka rikthyer shqetësimet për përhapjen e ekstremizmit, pas disa episodeve me thika në shkolla gjatë muajit tetor. Qytarët kanë vendosur qirinj dhe lule pranë vendit të ngjarjes në kujtim të viktimave, dhe sheshi kryesor dhe disa rrugë përreth tij janë mbyllur.