Bilanci tragjik në vend, çdo muaj humb jetën një punonjës, ekspertët: Situatë alarmante, nuk ka rregulla strikte për rekrutimin e tyre

Gjatë vitit 2026, 9 elektricistë kanë humbur jetën në vendin e punës, duke treguar se mesatarisht pothuajse një punonjës i këtij sektori ka humbur jetën çdo muaj gjatë kryerjes së detyrës. Vetëm në 4 ditët e fundit janë shënuar dy viktima, duke rikthyer në vëmendje rrezikun e lartë me të cilin përballen elektricistët gjatë ndërhyrjeve në terren.

Në fshatin Kocul të Vlorës, një 45-vjeçar humbi jetën më 6 nëntor, teksa grupi i punonjësve po kryente riparime në një nënstacion elektrik. Një ditë më parë, në fshatin Vasije të Kalasë së Dodës, një tjetër punonjës u zu poshtë nga një shtyllë elektrike gjatë punës.

“Nuk ka rregulla strikte për rekrutimin e elektricistëve të rinj”, shprehet eksperti Ilir Dizdari. Nga kontakti me rrymën elektrike, te shkëputja e rripit të sigurimit dhe rrëzimi i shtyllave, shkaqet e aksidenteve janë të ndryshme. Por ekspertët ngrenë edhe problematika të tjera që lidhen me kushtet dhe organizimin e punës në terren.

“Gjithë startuat teknike që janë pjesë e ministrisë së Infrastrukturës dhe Energjetikës, në stafet e ngushta nuk kanë favorizuar njerëz apo specialistë”, thotë ai. Pajisjet mbrojtëse, trajnimet dhe respektimi i procedurave teknike janë thelbësore për të shmangur aksidentet. Por përsëritja e rasteve fatale ngre pikëpyetje sipas ekspertëve mbi zbatimin e këtyre rregullave dhe përgjegjësinë për garantimin e sigurisë së punonjësve.

Ekspertët bëjnë thirrje për masa konkrete për të parandaluar rastet në mënyrë që puna në shërbim të qytetarëve mos të kthehet në një rrezik për jetën e vetë punonjësve.