Trupi i një gruaje të re gjetur në valixhë në Athinë, dyshimet për vrasje
Trupi i një gruaje të re është gjetur në një valixhë të braktisur në trotuar në Athinë, Greqi. Gruaja, e moshës 17-25 vjeç, ishte e lidhur dhe në një fazë të avancuar dekompozimi.
Një ngjarje e rëndë është regjistruar në zonën e Agios Panteleimonas në Athinë, ku trupi i pajetë i një gruaje të re është gjetur brenda një valixheje të braktisur në trotuar. Sipas mediave greke, trupi i viktimës ishte i lidhur dhe ndodhej në një fazë të avancuar dekompozimi. Dyshohet se bëhet fjalë për një vajzë të huaj, e moshës 17 deri në 25 vjeç. Valixhja u zbulua në kryqëzimin e rrugëve Alkmenous dhe Charissis, pasi një 29-vjeçar i huaj konstatoi një erë të rëndë që vinte prej saj dhe njoftoi policinë. Pas mbërritjes në vendngjarje, efektivët kryen kontrollin dhe zbuluan brenda valixhes trupin e pajetë të gruas. Zona u rrethua menjëherë, ndërsa në vendngjarje mbërriti edhe mjeku ligjor. Nga këqyrja e parë nuk janë konstatuar dëmtime të dukshme në trupin e viktimës, por gjendja e avancuar e dekompozimit nuk ka lejuar nxjerrjen e përfundimeve të sigurta për shkaqet e vdekjes. Sipas vlerësimeve paraprake, gruaja dyshohet se kishte ndërruar jetë të dy ditë përpara se të gjendej. Përgjigjet për shkaqet e sakta të vdekjes pritet të dalin nga ekspertiza mjekoligjore. Hetimet për zbardhjen e plotë të ngjarjes i janë besuar Departamentit të Vrasjeve të Policisë Greke. Autoritetet po punojnë gjithashtu për identifikimin e viktimës.