Kenia sekuestron 454 kilogramë metamfetaminë me vlerë 27 milionë dollarë, tre persona në pranga

Policia keniane ka sekuestruar 454 kilogramë metamfetaminë, me vlerë të përllogaritur prej rreth 27 milionë dollarësh, në një operacion të madh kundër trafikut ndërkombëtar të drogës. Gjatë operacionit, të zhvilluar në brigjet e Kenias dhe të bazuar në informacione të inteligjencës nga autoritetet keniane dhe ato të Tanzanisë, janë arrestuar tre persona, dy shtetas nga Tanzania dhe një nga Uganda. Sipas policisë, hetimet nisën pas arrestimit të një personi të dyshuar në Tanzani javën e kaluar, i cili më pas iu dorëzua autoriteteve keniane në kufi. Ai dyshohet se kishte lidhje edhe me një tjetër operacion të mëparshem, gjatë të cilit në Tanzani ishin sekuestruar 299 kilogramë metamfetaminë dhe heroinë. Informacionet e dhëna prej tij i drejtuan hetuesit drejt vendit ku ishte fshehur sasia e madhe e drogës. Gjatë marrjes në pyetje të të arrestuarve, autoritetet zbuluan se lënda narkotike ishte futur në Kenia përmes portit të Mombasës. Hetimet e mëtejshme treguan se disa prej të dyshuarve ishin pjesë e një rrjeti ndërkombëtar të trafikut të drogës, i cili vepronte në disa vende afrikane, si dhe në Emiratet e Bashkuara Arabe. Ky operacion konsiderohet një nga sekuestrimet më të mëdha të drogës në historinë e Kenias. Vetëm muajin e kaluar, Marina Keniane kishte identifikuar një anije pranë brigjeve të vendit, në Oqeanin Indian, e cila transportonte rreth një ton lëndë narkotike. Metamfetamina është një drogë sintetike me potencial të lartë varësie. Konsumimi i saj mund të shkaktojë pasoja të rënda shëndetësore, përfshirë psikozë, atak në zemër dhe goditje në tru.