Al Nassr përgatit kontratën e majme për Joao Felix

Klubi Al Nassr është duke përgatitur një kontratë të re për sulmuesin portugez Joao Felix, që mund të jetë një nga emrat më të diskutuar në merkaton e ardhshme të transferimeve. Sulmuesi i Al Nassr ka rigjetur buzëqeshjen në Arabinë Saudite dhe ka treguar se është në nivelin e duhur për t’u kthyer në Evropë në moshën 26 vjeçare.

Portugezi nuk e ka fshehur kurrë dëshirën për t’u kthyer në Kontinentin e Vjetër për të vijuar karrierën dhe më konkretisht në Camp Nou. Zërat që shpërthyen në ditët e fundit bënë që të ndizen sirenat e alarmit në futbollin arab e në mënyrë të veçantë te Al Nassr, drejtuesit e të cilit kanë vendosur të lëvizin sa më shpejt për të evituar largimin e tij.

Sipas informacioneve që vijnë nga Arabia Saudite dhe që gjejnë jehonë edhe në Portugali, Al Nassr ka nisur bisedimet me Joao Felix dhe agjentin e tij Jorge Mendes për të siguruar qëndrimin e futbollistit edhe për 2 vjet të tjerë. Kontrata aktuale e luzitanit skadon në qershor të 2027 dhe duke nisur nga muaji janar, nëse nuk do të ketë zyrtarizim të rinovimit të kontratës, Joao Felix do të jetë i lirë të nisë tratativat më çdo klub.

Në këtë pikë, sipas të përditshmes saudite ‘Okaz’ bisedimet janë në zhvillim e sipër dhe në to përfshihet edhe propozimi për rritje të pagës së futbollistit. Me këtë propozim të ri, Joao Felix do të përfitojë 2.5 milionë euro më shumë në sezon pasi paga e tij do të kalonte nga 10 deri në 12.5 milionë euro deri në qershor të 2029.