Ambasadorja e BE-së: Reforma Zgjedhore është po aq e rëndësishme sa edhe koha

Ambasadorja e Bashkimit Evropian në Shqipëri, Sofia Moreira de Sousa, ka zhvilluar takimin e parë me bashkëkryetarët e Komisionit të Posaçëm Parlamentar për Reformën Zgjedhore, Damian Gjiknuri dhe Oerd Bylykbashi. Në fokus të diskutimeve kanë qenë afatet e ngushta kohore, prioritetet dhe gjithëpërfshirja e reformës zgjedhore. Përmes një deklarate, ambasadorja e BE-së theksoi rëndësinë e realizimit të një reforme cilësore, duke nënvizuar se cilësia e saj është po aq e rëndësishme sa edhe koha brenda së cilës duhet të përmbyllet procesi. Gjatë takimit, palët diskutuan për fushëveprimin e Komisionit, përcaktimin e prioriteteve dhe nevojën për përfshirjen e të gjitha palëve në procesin e reformës. Moreira de Sousa theksoi se reforma zgjedhore lidhet drejtpërdrejt me besimin e publikut, garantimin e konkurrencës së ndershme dhe integritetin e zgjedhjeve. “Cilësia e reformës zgjedhore është po aq e rëndësishme sa edhe koha kur ajo realizohet. Zhvillova takimin tim të parë me bashkëkryetarët e Komisionit të Posaçëm Parlamentar për Reformën Zgjedhore, Damian Gjiknuri dhe Oerd Bylykbashi. Diskutuam për afatin shumë të ngushtë kohor brenda të cilit duhet të punojë Komisioni, si dhe për çështje që lidhen me fushëveprimin, prioritetet dhe gjithëpërfshirjen e reformës. Reforma zgjedhore ka të bëjë me besimin e publikut, konkurrencën e ndershme dhe integritetin e zgjedhjeve. Ajo është gjithashtu pjesë e rrugëtimit të Shqipërisë drejt BE-së. Rekomandimet e OSBE/ODIHR-it kanë qenë prej kohësh të qarta dhe puna e përbashkët e kryer deri më tani duhet të japë rezultate konkrete. Me vullnet politik dhe dialog të sinqertë nga të gjitha palët, kjo është e arritshme”, tha ambasadorja e BE-së, Sofia Moreira de Sousa.