Shembet ura hekurudhore në Rusi, dalin vagonët e mallrave dhe ndërpritet qarkullimi i trenave të pasagjerëve

Një urë hekurudhore është shembur mëngjesin e kësaj të marte në rajonin e Arkhangelskut, në veri të Rusisë, duke shkaktuar daljen nga shinat e disa vagonëve të një treni mallrash dhe ndërprerjen e qarkullimit hekurudhor në zonë. Ngjarja është regjistruar rreth orës 05:10, kur një pjesë e urës mbi lumin Vilen u shemb në segmentin hekurudhor mes Cheryomukha dhe Vilen.

Guvernatori i rajonit të Arkhangelskut, Alexander Tsybulsky, konfirmoi incidentin, duke bërë të ditur se deri në momentin e raportimit nuk kishte informacione për persona të lënduar. Si pasojë e shembjes, trafiku hekurudhor në këtë segment është ndërprerë, ndërsa të paktën tetë trena pasagjerësh kanë pësuar vonesa. Në vendngjarje janë dërguar ekipe të specializuara dhe trena shpëtimi për të ndërhyrë dhe për të vlerësuar dëmet e shkaktuara.

Shërbimet përkatëse kanë nisur hetimet për të zbardhur shkaqet e shembjes. Deri tani nuk ka një version zyrtar nëse bëhet fjalë për probleme në konstruksionin e urës, dëmtime të infrastrukturës apo ndonjë shkak tjetër. Autoritetet ruse pritet të japin më shumë detaje në vijim, ndërsa vijojnë punimet për normalizimin e situatës dhe rikthimin e qarkullimit hekurudhor në zonën e prekur.