Meta kërkon rikthimin e Kushtetutës së para 2008 dhe hapjen e listave të zgjedhore për të rikthyer sovranitetin e qytetarëve

Ish-presidenti Ilir Meta ka reaguar në lidhje me Reformën Zgjedhore, duke kërkuar ndryshime të thella në sistemin politik dhe zgjedhor të vendit. Përmes një postimi, Meta kërkon rikthimin e Kushtetutës së para ndryshimeve të vitit 2008, hapjen 100% të listave zgjedhore dhe rikthimin e balotazhit për zgjedhjen e kryetarëve të bashkive. Ai i cilëson këto si zgjidhjet e vetme për rikthimin e sovranitetit te qytetarët. Meta argumenton se rikthimi i Kushtetutës së para ndryshimeve të vitit 2008 do të rivendosë ndarjen e pushteteve, sistemin e kontrollit dhe balancës ndërmjet tyre, duke garantuar funksionimin e shtetit të së drejtës dhe demokracisë. Ai gjithashtu kërkon hapjen 100% të listave për zgjedhjen e deputetëve dhe këshilltarëve bashkiakë, në mënyrë që mandatin ta marrin drejtpërdrejt nga qytetarët dhe jo nga kryetarët e partive. Meta është i mendimit se vetëm kështu sovraniteti i rikthehet popullit dhe garantohet e drejta që krahas kandidatëve të partive politike edhe qytetarë me kontribute, integritet dhe mbështetje publike të mund të garojnë e të zgjidhen si kandidatë të pavarur.