Forumi Rinor Islamik, organizatë terroriste sipas Egjiptit, lidhur me Kryetarin e Këshillit të Komunës së Çairit
Egjipti ka përfshirë në listën e organizatave terroriste 35 subjekte që veprojnë në vende të ndryshme të Europës, mes tyre edhe organizata shqiptare ne tre shtete, Forumi Rinor Islamik. Kryetar i këtij forumi është Muhamed Murtezi, aktualisht kryetar i Këshillit të Komunës së Çairit dhe përfaqësues i koalicionit shqiptar VLEN.
Gjykata egjiptiane ka shpallur organizatën Vëllazëria Myslimane si organizatë terroriste, duke i konsideruar rrjetet ndërkombëtare të lidhura me të si një kërcënim për sigurinë kombëtare. Këto rrjeta synojnë të kufizojnë financimin, organizimin dhe ndikimin e tyre jashtë kufijve të Egjiptit. Në listën e shpallur janë organizata dhe shoqata islamike në shumë vende të Europës perëndimore, por edhe shumë persona.
Muhamed Murtezi, kryetar i Këshillit të Komunës së Çairit dhe përfaqësues i koalicionit shqiptar VLEN, është një nga anëtarët e Forumit Rinor Islamik. Ai shfaqet në shumë prej organizimeve që kryhen, ku mban ligjërime islame përpara pjesëmarrësve. Në kanalin e Youtube të këtij forumi, Murtezi shfaqet në disa video duke mbajtur ligjërime islame, të cilat janë të publikuara në këtë platformë.
Vendimi i Kajros vjen si pjesë e luftës që autoritetet egjiptiane ndjekin kundër Vëllazërisë Myslimane, e cila ka shumë degë në bote. Organizata, e themeluar në Egjipt në vitin 1928, u shpall terroriste nga autoritetet egjiptiane në vitin 2013, pas rrëzimit nga pushteti të presidentit Mohamed Morsi.