Stuhia "Charles" godet Portugalinë dhe Spanjën

Stuhia "Charles" ka goditur Portugalinë dhe Spanjën me reshje të dendura dhe erëra të forta, duke shkaktuar përmbytje dhe rrëzimin e pemëve në Madeirë. Mbi 200 fluturime janë anuluar, shkollat dhe bizneset kanë pezulluar aktivitetin, dhe qytetarët janë kërkuar të qëndrojnë në banesa.

Autoritetet portugeze kanë marrë masa paraprake për të përballuar situatën, duke vënë në gatishmëri të gjitha shërbimet e emergjencës dhe njësitë ushtarake. Gjithashtu, janë pezulluar mësimet në shkolla, janë mbyllur shërbimet publike jo thelbësore dhe qytetarëve u është kërkuar të qëndrojnë në banesa.

Stuhia "Charles" ka goditur edhe arkipelagun e Madeirës, ku shkaktoi përmbytje dhe rrëzimin e pemëve. Shërbimet e emergjencës ndërhynë për të shpëtuar një burrë, i cili ishte marrë nga rrjedha e ujit pasi garazhi i tij u përmbyt. Fatmirësisht, nuk u raportuan viktima.

Ndërkohë, Portugalia dhe Spanja po përballen me një situatë të vështirë meteorologjike prej disa ditësh. Që nga e diela, të dy vendet janë goditur nga reshjet e dendura të shkaktuara nga stuhia Bruna, e cila ka sjellë përmbytje në disa zona. Në Lisbonë, disa tunele rrugore mbetën kryesisht të mbyllura edhe gjatë ditës së sotme.

Rreziku tashmë po zhvendoset drejt Spanjës jugperëndimore, ku stuhia Charles pritej të mbërrinte gjatë pasdites. Agjencia meteorologjike spanjolle AEMET ka paralajmëruar për pasoja potencialisht serioze ose shumë serioze, për shkak të reshjeve intensive, erërave të forta dhe detit të trazuar. Autoritetet druhen se kushtet e reja atmosferike mund ta përkeqësojnë edhe më shumë situatën e krijuar nga stuhia Bruna.

Në Spanjën qendrore, ndërkohë, autoritetet kanë mbajtur në fuqi urdhrin e evakuimit në zonën e Piedralaves, ku më shumë se 3,000 banorë u larguan nga banesat e tyre të martën, për shkak të rrezikut të përmbytjes së një dige lokale. Gjithashtu, qytetarët janë paralajmëruar se reshjet pritet të intensifikohen gjatë orëve në vijim.