Galatasaray homazhe për Xhevat Prekazin, yllin e futbollit kosovar që donte Beogradin

Klubi i madh turk, Galatasaray, reagoi me nderime të veçanta për vdekjen e Xhevat Prekazit. Ish-futbollisti Xhevat Prekazi u nda nga jeta pak ditë më parë në moshën 69-vjeçare dhe konsiderohet një ndër futbollistët më të mirë që ka nxjerrë futbolli kosovar në dekada.

Prekazi lindi në Mitrovicë dhe debutoi për Partizanin e Beogradit në sezonin 1977/1978 ku shënoi 19 gola në 153 ndeshje, duke fituar tre tituj kampioni. Ish-mesfushori e kaloi te Galatasaray një pjesë të karrierës, ndërsa me klubin turk ka fituar ty tituj rresht, 1986/1987 dhe 1987/1988.

“Jemi thellësisht të pikëlluar nga humbja e Xhevat Prekazit, i cili e shkroi emrin e tij me shkronja të arta në historinë e Galatasarayt dhe la një gjurmë të pashlyeshme në kujtimet tona, përmes futbollit dhe karakterit të tij.

Prekazi, i cili bëri për vete një brez të tërë tifozësh të Galatasarayt falë golave të tij të paharrueshëm dhe gëzimit të papërshkrueshëm që na dhuroi, do të mbetet përgjithmonë në zemrat tona. Nuk do të harrojmë kurrë. Zoti e mëshiroftë Xhevat Prekazin.

U shprehim ngushëllimet tona familjes së tij, njerëzve të dashur dhe të gjithë atyre që e donin atë”, shkruan në reagimin e Galatasarayt.

Për skuadrën turke ai shënoi 40 gola në 185 ndeshje, ndërsa gjatë karrierës ka luajtur edhe te Partizani i Beogradit e Hajduku i Splitit.

Gjatë karrierës së tij si futbollist luajti edhe për U021 e ish-Jugosllavisë, ndërsa disa deklarata kontroverse për Serbinë dhe Kosovën e “ftohën” atë me Prishtinën.

Në një rast ai kishte deklaruar se nuk e ndiqte kombëtaren e Kosovës, ndërsa në një moment tjetër kishte shprehur keqardhje që Serbia nuk ishte kualifikuar në Botëror, duke ngjallur reagime dhe kritika nga tifozët dardanë.