Zjarr në magazinë druri në Gjirokastër, ndërhyrja e zjarrfikësve parandalon përhapjen e flakëve

Një zjarr ka rënë mbrëmjen e sotme në një magazinë prej druri, pranë ish-Parkut në qytetin e Gjirokastrës. Njoftimi për ngjarjen është marrë në orën 21:20 nga Salla e Informacionit pranë Drejtorisë së MZSH-së Gjirokastër, e cila ka dërguar menjëherë në vendngjarje dy grupe shërbimi. Për shuarjen e flakëve janë angazhuar dy automjete zjarrfikëse dhe një autobot për furnizimin me ujë. Pas mbërritjes, efektivët konstatuan se zjarri kishte përfshirë ambientet e brendshme të magazinës, ku ndodheshin materiale drusore, duke krijuar rrezik për përhapjen e flakëve në të gjithë objektin. Për të bërë të mundur ndërhyrjen nga jashtë, zjarrfikësit prenë hekurat mbrojtëse të një dritareje, përmes së cilës mundën të depërtonin me ujë drejt vatrës së zjarrit. Falë ndërhyrjes së shpejtë, flakët u izoluan në kohë dhe u parandalua përhapja e zjarrit në pjesët e tjera të magazinës. Nga incidenti janë shkaktuar vetëm dëme të vogla materiale. Fatmirësisht, zjarri nuk është përhapur në ambientet e tjera të objektit.