Berisha rikthehet, Manaj në krye të sulmit, Maran ka vendosur, kjo është Shqipëria që kërkon fitoren!
Kombëtarja shqiptare do të rikthehet në fushë me një formacion që ka fituar stabilitet gjatë përgatitjes për ndeshjen kundër Finlandës në Ligën e Kombeve.
Kuqezinjtë kërkojnë revanshin ndaj finlandezëve dhe tri pikët në “Arenën Kombëtare”. Berisha rikthehet mes shtyllave, treshja e mbrojtjes duket e përcaktuar, ndërsa në ofensivë pritet një kombinim me Laçin, Muçin dhe Manajn.
Në portë pritet të rikthehet Etrit Berisha, ndërsa para tij do të vendoset treshja e mbrojtjes me Mario Mitajn, Berat Gjimshitin dhe Ardian Ismajlin. Në krahë, Elseid Hysaj dhe Stavro Pilo do të kenë përgjegjësi të dyfishta, si në fazën mbrojtëse, ashtu edhe në daljet përpara.
Në mesin e fushës, Kristjan Asllani dhe Ylber Ramadani pritet të formojnë dyshen që do të kujdeset për organizimin dhe ekuilibrin e lojës. Ky është një nga repartet ku Maran duket se ka më pak dilema, ndërsa alternativa e Juljan Shehut mbetet në dispozicion në rast ndryshimi të planit.
Në sulm, Rey Manaj pritet të jetë pika e referimit, me Ernest Muçin dhe Qazim Laçin që do të luajnë pas tij, duke i dhënë skuadrës më shumë mundësi për të krijuar rrezik në zonën kundërshtare. Megjithatë, Arbër Hoxha mbetet një alternativë për këtë repart, në varësi të vendimit përfundimtar të trajnerit.
Ndeshja Shqipëri–Finlandë do të luhet të enjten, më 12 nëntor, në orën 20:45, në “Arenën Kombëtare”, me transmetim të drejtpërdrejtë dhe ekskluzivisht në Digitalb.