Komisioni i Ligjeve miraton projektligjin për strehimin social, opozita: Të paktën të bashkoheshit me votë
Komisioni për Çështjet Ligjore dhe Administratën Publike ka miratuar projektligjin për ndryshimet në ligjin për strehimin social, duke parashikuar kredi me interes zero për blerjen e banesave dhe subvencionimin e 50% të qirasë për studentët dhe profesionistët.

Gjatë votimit, kryetari i komisionit, Ulsi Manja, deklaroi se deputetët e opozitës duhet të kishin marrë pjesë në votimin e projektligjit, duke theksuar se duhet të tregojnë se edhe ata kanë sensibilitetin e njerëzve që gjoja u dalin në mbrojtje. Manja theksoi se deputetët ende kanë mundësi të propozojnë ndryshime përpara miratimit përfundimtar të projektligjit në Kuvend.
Ministrja e Ekonomisë dhe Inovacionit, Delina Ibrahimaj, shpjegoi se ndryshimet synojnë zgjerimin e mundësive për strehim të përballueshëm, veçanërisht për çiftet e reja, familjet dhe profesionistët. Ajo tha se ndryshimet parashikojnë kredi me interes zero për blerjen e banesave, subvencionimin e 50% të qirasë për studentët dhe profesionistët, si dhe mundësinë që një pjesë e qirasë së paguar të llogaritet për blerjen e shtëpisë.
Ndryshimet përfshijnë edhe modelin 30-40-30 për ndërtimin e lagjeve të integruara, ku 30% e banesave do të përdoren për strehim social, 40% për strehim të përballueshëm dhe 30% do të shiten ose jepen me qira në tregun e lirë. Për financimin e këtyre programeve parashikohet krijimi i Fondit për Strehimin dhe Kohezionin Social, i cili do të mbledhë fonde nga buxheti i shtetit, sektori privat dhe burime të tjera të ligjshme.