"Debate në komision për strehimin social, opozita: Çmimet e banesave janë rritur tri herë më shumë se pagat"
Deputetët e opozitës, Klodiana Capja dhe Redi Muçi, kundërshtuan nismën e qeverisë për strehimin social në Komisionin për Burimet Natyrore, Infrastrukturën dhe Zhvillimin e Qëndrueshëm, duke e cilësuar atë propagandë dhe duke ngritur shqetësimin për çmimet e larta të banesave.

Debateja për projektligjin për strehimin social në Komisionin për Burimet Natyrore, Infrastrukturën dhe Zhvillimin e Qëndrueshëm, u zhvillua në një atmosferë të ngushtë, pasi deputetët e opozitës, Klodiana Capja dhe Redi Muçi, kundërshtuan nismën e qeverisë. Deputetja Capja deklaroi se qeveria është kujtuar për politikat sociale në prag të vitit elektoral dhe kritikoi mënyrën se si janë zbatuar programet e mëparshme të strehimit.
“Në prag të vitit elektoral qeveria kujtohet për politika sociale. Çdo i ri në shesh që proteston nuk ka asnjë mundësi të blejë një banesë. E gjithë kjo më duket se është në kuadër të propagandës”, tha Capja.
Deputeti Muçi, në të njëjtin mendim, e cilësoi strehimin një nga problemet më të mëdha të vendit dhe deklaroi se rritja e çmimeve të apartamenteve në Tiranë ka qenë tri herë më e lartë se rritja e pagave. “Që kur keni ardhur ju në pushtet, kemi parë që raporti i rritjes së pagave me çmimin e apartamenteve në Tiranë është 1 me 3. Vetë sektori i ndërtimit po shkon drejt një flluske ekonomike që do të plasë, që mbahet në këmbë falë parave që vijnë nga pastrimi i parave të drogës. Këtë e vërtetojnë dosjet e SPAK-ut”, tha Muçi.
Ministrja Delina Ibrahimaj tha se nisma synon të përshtatë politikat me rritjen e çmimeve dhe nevojat e qytetarëve. “Nuk dëgjova asnjë propozim. Propozimet nuk vijnë si pasojë e dështimit. Qëllimi është të fusim instrumente të reja, jo të hedhim poshtë një projektligj të suksesshëm”, tha Ibrahimaj.
Debateja për projektligjin për strehimin social vazhdon dhe deputetët e opozitës po përgatiten për të paraqitur amendamente në seancën plenare.