Arrestuar një shqiptar në Maqedoni për sulm terrorist në Greqi
Një shqiptar nga Maqedonia e Veriut është arrestuar nën dyshimin se po përgatiste një akt terrorist në Greqi. Dyshohet se ai do të kryente një atentat ndaj një biznesmeni izraelit që mbante një post të lartë në një kompani të prodhimit të armëve.

Një shqiptar nga Maqedonia e Veriut është arrestuar nën dyshimin se po përgatiste një akt terrorist në Greqi. Dyshohet se ai do të kryente një atentat ndaj një biznesmeni izraelit që mbante një post të lartë në një kompani të prodhimit të armëve. Shpëtim Musliu, i lindur në vitin 1996, është një nga katër shqiptarët që janë arrestuar në Maqedoni për të përgatitur një sulm terrorist në Greqi. Musliu është një nga anëtarët e një celule radikale që kishte planifikuar të kryente një atentat në Greqi. Musliu dhe anëtarët e tjerë të celulës janë dyshuar se do të kryenin një atentat ndaj një biznesmeni izraelit që mbante një post të lartë në një kompani të prodhimit të armëve. Operacioni dyshohet se ishte financuar nga një shtetas iranian, Mabanex, i cili kishte marrë urdhër nga shërbimet iraniane të inteligjencës për eliminimin e biznesmenit izraelit. Musliu dhe anëtarët e tjerë të celulës kishin tentuar të kalonin kufirin drejt Greqisë, por nuk ishin lejuar të hynin në vend, pasi rezultonin në listat e personave të dyshuar për pikëpamje radikale. Në një tentativë të dytë, Musliu u ndalua pasi shërbimet greke ishin njoftuar nga homologët e tyre në Maqedoninë e Veriut për planin e celulës. Autoritetet greke kanë bërë të ditur se e kishin mbajtur grupin nën përgjim për afro një vit. Pas dorëzimit të Musliut pranë autoriteteve të Maqedonisë së Veriut, shërbimet greke kanë nisur një valë të re hetimesh për të zbuluar nëse anëtarët e kësaj celule radikale kanë bashkëpunëtorë apo udhëzues shpirtërorë në qarqet e komunitetit mysliman që jeton në Greqi.