I dënua përjetësisht për përdhunimin dhe vrasjen e një 80-vjeçare, kërkon 100 mijë paund dëmshpërblim
Një i dënuar me burgim të përjetshëm për përdhunimin dhe vrasjen brutale të një të moshuare 80-vjeçare, ka kërkuar 100 mijë paund dëmshpërblim nga shteti britanik.

Një 60-vjeçar, i dënuar me burgim të përjetshëm për përdhunimin dhe vrasjen brutale të një të moshuare 80-vjeçare, ka kërkuar 100 mijë paund dëmshpërblim nga shteti britanik, pasi një i burgosur tjetër i hodhi në fytyrë një përzierje me ujë të valuar dhe gjalpë. Charles Stapleton, i dënuar në vitin 2018 me të paktën 31 vite burg për vrasjen e Teresa Wishart, pretendon se autoritetet e burgut nuk arritën ta mbronin nga sulmi i ndodhur në shkurt të vitit 2024, në burgun HMP Frankland, në Durham. Si pasojë, ai ka pësuar djegie në fytyrë, qafë, shpatull, gjoks dhe dorë. I dënuari pretendon gjithashtu se sulmi i ka shkaktuar probleme sociale dhe siklet për shkak të shenjave të mbetura nga djegiet. Ministria britanike e Drejtësisë i mohon akuzat për neglizhencë, duke argumentuar se sulmi ishte i paparashikueshëm. Çështja pritet të shqyrtohet në një gjyq dyditor verën e ardhshme. Ndërkohë, janë miratuar rreth 96 mijë paund për shpenzimet ligjore të Stapleton dhe 84 mijë paund për përfaqësimin e Ministrisë së Drejtësisë, kosto që do të mbulohen nga taksapaguesit.