TENSIONET NË BULEVARDIN "DËSHMORËT E KOMBIT"

Gazetari i Euronews, Eni Ferhati, raportoi nga bulevardi “Dëshmorët e Kombit”, ku vijojnë tensionet mes protestuesve dhe policisë. Forcat operacionale dhe policët civilë kanë nisur shoqërimet e protestuesve. Protestuesit janë grumbulluar sërish në bulevard dhe tentuan të afrohen pranë Kryeministrisë, por iu hodh gaz lotsjellës. Aty kaloi një automjet policie, ndërsa protestuesit e qëlluan me gurë. Ka pasur shoqërime edhe pranë Shallvareve dhe ka thirrje nga protestuesit që të afrohen sërish te Kryeministria. Shumë prej tyre janë me maska, me ujë, me serume, të gjitha pajisjet për të përballuar reagimin e policisë. Nga ana e organeve ligjzbatuese kanë nisur hetimet në lidhje me pretendimet e policisë dhe pretendimet politike për këtë protestë.