Meksika mbyll liqenet e Jukatanit pas vdekjes nga ameba që “ha trurin”
Autoritetet në Meksikë kanë mbyllur gjashtë liqene artificiale në rajonin turistik të Jukatanit, pasi në ujërat e tyre u zbulua ameba Naegleria fowleri, e njohur si “ameba që ha trurin”.
Autoritetet në Meksikë kanë mbyllur gjashtë liqene artificiale në rajonin turistik të Jukatanit, pasi në ujërat e tyre u zbulua ameba Naegleria fowleri, e njohur si “ameba që ha trurin”. Masa u mor pas vdekjes së një trajneri të skive në ujë, i cili humbi jetën në shtator si pasojë e infeksionit. Zyrtarët e shëndetësisë analizuan ujin në gjashtë nga nëntë liqenet e zonës. Këto hapësira artificiale përdoren për aktivitete rekreative, si skijimi në ujë dhe kajaku, dhe ndodhen pranë qendrave tregtare dhe komplekseve luksoze të pushimit. Ministri i Shëndetësisë i Jukatanit, Alberto Alcocer, u bëri thirrje banorëve që të kërkojnë menjëherë ndihmë mjekësore nëse dyshojnë se kanë qenë në kontakt me ujë të kontaminuar. Ai sqaroi se zbulimi i amebës në mjedis nuk nënkupton domosdoshmërisht përhapjen e një epidemie dhe as që të gjithë personat që kanë vizituar zonën janë të rrezikuar nga infeksioni. Infektimi ndodh kur uji i kontaminuar hyn në organizëm përmes hundës. Trajneri i skive në ujë, rasti i të cilit çoi në kontrollet e autoriteteve, ishte shtruar në spital për disa ditë, por nuk arriti të mbijetonte. Ai ndërroi jetë nga meningoencefaliti amebik primar, një inflamacion shumë i rrallë dhe i rëndë i trurit, i shkaktuar nga kjo amebë.