Dhuna gjatë tubimit në Korçë, dy persona arrestohen dhe 23 të tjerë procedohen penalisht

Dy persona janë arrestuar në flagrancë dhe 23 të tjerë janë proceduar penalisht, 15 prej tyre të mitur, pas akteve të dhunës të regjistruara gjatë tubimit të zhvilluar më 15 tetor në qytetin e Korçës.

Sipas Policisë, gjatë tubimit, dhjetëra pjesëmarrës, disa prej tyre të maskuar, kanë hedhur gurë, pllaka guri dhe sende të forta metalike në drejtim të institucioneve shtetërore dhe pronave publike, si dhe kanë kundërshtuar punonjësit e Policisë.

Si pasojë e incidenteve, janë dëmtuar godinat e Bashkisë Korçë, Drejtorisë Arsimore, Universitetit “Fan S. Noli” dhe gjimnazit “Raqi Qirinxhi”. Dëmtime janë shkaktuar edhe në kangjellat e trotuareve, tabelat e reklamave dhe sinjalistikën rrugore.

Në vijim të veprimeve hetimore, të kryera në drejtimin e Prokurorisë së Korçës, janë arrestuar shtetasit F. L., 21 vjeç, banues në Voskop, dhe O. K., 19 vjeç, banues në Bilisht. Ndërkohë, ndaj 23 shtetasve të tjerë ka nisur procedimi penal.

Grupi hetimor, në bashkëpunim me Prokurorinë, vijon punën për dokumentimin e plotë të ngjarjes dhe identifikimin e personave të tjerë që dyshohet se janë përfshirë në akte dhune ndaj punonjësve të Policisë, institucioneve shtetërore dhe subjekteve private.

Materialet procedurale i janë referuar Prokurorisë së Korçës për veprime të mëtejshme.