Protesta në Korçë, dy të arrestuar dhe 23 të proceduar penalisht

Policia ka njoftuar se dy persona janë vënë në pranga dhe 23 të tjerë janë proceduar penalisht për shkak të incidenteve të regjistruara gjatë protestës së studentëve në qytetin e Korçës. Protesta u zhvillua një ditë më parë dhe gjatë saj, pjesëmarrës të maskuar kanë ushtruar akte dhune, duke hedhur gurë dhe sende të forta drejt institucioneve shtetërore dhe pronave publike.

Gjatë protestës, godinat e bashkisë Korçë, Drejtorisë Arsimore, universitetit “Fan. S. Noli” dhe gjimnazit “Raqi Qirinxhi” u dëmtuan, si dhe kangjellat e trotuareve, tabelat e reklamave dhe sinjalistika rrugore. Punonjësit e Policisë u përballën me akte dhune dhe kundërshtim, përmes hedhjes së gurëve dhe sendeve të forta nga grupe pjesëmarrësish të maskuar.

Në vijim të veprimeve hetimore dhe procedurale të kryera në drejtimin e Prokurorisë së Korçës, u arrestuan në flagrancë shtetasit F. L., 21 vjeç, banues në Voskop dhe O. K., 19 vjeç, banues në Bilisht, si dhe u proceduan penalisht 23 shtetas (15 prej tyre të mitur). Grupi hetimor, në bashkëpunim me Prokurorinë, vijon punën për dokumentimin e plotë ligjor të veprimeve të kundërligjshme të kryera gjatë protestës dhe për identifikimin e shtetasve të tjerë të përfshirë në akte dhune.