39-vjeçari arrestohet në Shkodër për dhunë dhe tentim goditje me thikë

Një 39-vjeçar është arrestuar në Shkodër, pasi dyshohet se ka ushtruar dhunë ndaj bashkëjetueses së tij dhe ka tentuar ta godasë me thikë në banesë. Ngjarja u regjistrua në lagjen “Partizani”, ku ndërhyrja e shpejtë e Policisë parandaloi përshkallëzimin e mëtejshëm të dhunës. E dëmtuara ndodhet jashtë rrezikut për jetën, ndërsa thika u sekuestrua si provë materiale. Shërbimet e Komisariatit të Policisë Shkodër, pas marrjes së njoftimit për një rast dhune në familje, shkuan menjëherë në këtë banesë dhe kapën në flagrancë shtetasin A. D., në momentin që po tentonte të godiste me thikë bashkëjetuesen e tij. Në përfundim të veprimeve procedurale, u arrestua në flagrancë shtetasi A. D., 39 vjeç, banues në Shkodër, ndërsa thika u sekuestrua në cilësinë e provës materiale. Shtetasja e dëmtuar është jashtë rrezikut për jetën. Materialet procedurale iu referuan Prokurorisë, për veprat penale “Dhuna në familje” dhe “Prodhimi, mbajtja, blerja apo shitja pa leje e armëve të ftohta”.