Shërbimi i Postës Shqiptare nuk do të ndalet, qytetarët mund t’u drejtohen filialeve të tjera

Ministrja e Ekonomisë dhe Inovacionit, Delina Ibrahimaj, ka reaguar pas dëmtimit të një prej filialeve të Postës Shqiptare në Tiranë, si pasojë e akteve të dhunës. Përmes një postimi në Facebook, Ibrahimaj bëri të ditur se ka qenë në terren pranë një prej ambienteve të dëmtuara, duke theksuar se shërbimet për qytetarët do të vijojnë pavarësisht situatës. "Në terren, pranë një prej filialeve të Postës Shqiptare të dëmtuara nga aktet e dhunës në Tiranë. Shërbimi ndaj qytetarëve nuk do të ndalet! Pavarësisht dëmeve të shkaktuara ndaj pronës publike, mbetemi të angazhuar për të garantuar vijimësinë e shërbimeve të përditshme. Pensionistët dhe të gjithë qytetarët që marrin shërbime pranë filialeve të dëmtuara mund t’u drejtohen filialeve të tjera të Postës Shqiptare. Siguria e qytetarëve dhe vijimësia e shërbimeve mbeten prioriteti ynë", thotë Ibrahimaj. Sipas ministres, siguria e qytetarëve dhe garantimi i vijimësisë së shërbimeve mbeten prioritet.