Protestuesit që u la në burg, iu gjetën disa karta banke

Avokatët e disa prej protestuesve kanë folur pas dhënies së masave për 19 të arrestuarit e ditës së parë të protestës. Avokati Marash Logu shprehu se sipas tij e vetmja provë që prokurorja relatoi ishte pjesëmarrja në protestë, e cila nuk përbën vepër penale. Ai tha se për asnjë prej të arrestuarve nuk kishin prova që kishin kryer veprimtari të paligjshme.

Për 1 protestues arrest në burg, 6 arrest shtëpie dhe 12 detyrim paraqitje. 7 prej protestuesve kishin shenja të rënda dhune, Klevis Meta ndodhet në Spitalin e Traumës. Avokati Logu deklaroi se ishte ushtruar dhunë gjatë ndalimit, gjatë shoqërimit, por dhe gjatë mbërritjes së tyre në komisariat.

Ndërkohë Adriana Kalaja shprehu se personat që dolën para gjykatës, ishin studentë që sipas saj paraqitën prova dhune ndaj tyre nga policia. Ajo tha se një pjesë e konsiderueshme studentë, por marr rastin Klevis Metës dhe Xhejson Patokut, që është student ekselent i fizikës, dëshmoi para gjykatës, dispononte edhe prova për dhunë ekstreme, për shkelma. Ajo shpreh keqardhjen që Gjykata e Tiranës nuk u ngrit në lartësinë e detyrës, por thjesht u bë notere e organit të akuzës.

Avokati Kalaja deklaroi se një ditë pas protestës kam depozituar në SPAK kallëzim penal për dhunën e ushtruar, duke filluar nga ministri i Brendshëm, drejtori i Përgjithshëm i Policisë, drejtori i Tiranës, shefat e komisariateve 1, 2, 3, 4, 6, drejtori i Mbikëqyrjes Policore dhe personat e tjerë që kanë lidhje me konsumimin e veprave penale. Sot kam ardhur me një kallëzim të ri shtesë, ku kam referuar të gjitha veprat penale të dhunës barbare të bërë nga datë 14 e deri më sot, pasi kemi prova të mjaftueshme.