Grynkewich: NATO është shumë më e fuqishme se Rusia

Gjenerali amerikan Alexus Grynkewich, komandanti suprem i forcave aleate të NATO-s, deklaroi se NATO ka kapacitete ushtarake më të mëdha se Rusia dhe se do të kishte një epërsi të qartë në rast të një konflikti të gjerë. Sipas tij, kapacitetet ushtarake që aleanca do të vinte në dispozicion në një konflikt të madh "e tejkalojnë shumë fuqinë e Moskës".

Gjenerali amerikan theksoi se Rusia nuk disponon avionë luftarakë modernë F-35 dhe as numrin e madh të destrojerëve dhe nëndetëseve moderne që zotëron NATO. Ai nuk beson që Rusia do të ndërmarrë një sulm konvencional në shkallë të gjerë kundër Evropës.

Sipas tij, presidenti rus Vladimir Putin po përdor metoda të tjera, si sabotazhi, pasi nuk ka alternativa të tjera dhe nuk dëshiron një përballje të drejtpërdrejtë ushtarake me aleancën. Grynkewich argumentoi se parandalimi ushtarak konvencional është një nga faktorët kryesorë që pengojnë një konflikt të tillë. Ai nënvizoi se NATO duhet ta ruajë këtë epërsi përmes modernizimit të forcave të armatosura, zhvillimit të stërvitjeve të gjera ushtarake dhe demonstrimit të vazhdueshëm të kapaciteteve të saj.

I pyetur nëse veprimet ruse mund të përshkruhen si luftë në hije, komandanti i NATO-s tha se termi "sulme hibride" është tepër i përgjithshëm për të përshkruar veprime konkrete. "Duhet t’i quajmë gjërat me emrin e tyre: sabotazh, zjarrvënie apo sulme terroriste janë terma të saktë, me përgjigje të qarta", deklaroi ai.