Deputeti Kapri denoncon dhunën e policisë ndaj një 20-vjeçari

Deputeti i Partisë Mundësia, Erald Kapri, ka denoncuar dhunën e policisë ndaj një 20-vjeçari Eldi Demirxhiu, i cili u rrëmbye nga 10 policë. Kapri deklaron se ngjarja ndodhi para syve të tij dhe se të riun më pas e kërkoi dhe e gjeti pas mesnate në Komisariatin nr. 1, me shenja dhune në fytyrë. Vetë i riu ka dëshmuar dhunën e ushtruar ndaj tij pa asnjë shkak. Reagimi i plotë i deputetit Erald Kapri: “Eldi Demirxhiu është 20 vjeç dhe u rrëmbye para syve të mi nga 10 policë që e tërhoqën zvarrë. E kërkova dhe e gjeta pas mesnate në komisarian nr 1 të dhunuar, të nxirë nga grushtat në fytyrë. Më tha që ‘krimi’ i vetëm ishte se po shëtiste pranë Lanës me një shoqen e tij. E takova sot sërish pranë Bllokut të Sigurisë ku do e mbajnë edhe dy ditë të tjera. Prindërit e tij nuk lëvizin nga dera e komisariatit dhe ende nuk e kanë takuar dot”, shkruan Kapri.