Krim i rëndë në Itali: Gjeten dy trupat e një çifti të moshuarish, ndalohet djali i gruasë
Një çift i moshuarish është gjetur i vrarë në banesën e tyre në Itali, ndërsa djali i gruasë është ndaluar si i dyshuar për vrasjen e tyre.
Një ngjarje e rëndë ka tronditur qytetin e Mirandolës, në provincën e Modenës, Itali, ku një çift të moshuarish është gjetur i vrarë dhe me kokat e prera brenda banesës së tyre. Viktimat janë identifikuar si Vincenza Giannini, 74 vjeçe dhe bashkëshorti i saj, Pier Ferdinando Casari, 83 vjeç.
Sipas hetimeve paraprake, Tavoni dyshohet për vrasjen e dyfishtë. Në banesën ku ai jetonte, pranë shtëpisë së viktimave, hetuesit kanë gjetur mjete me gjurmë të shumta gjaku, të cilat dyshohet se mund të jenë përdorur në kryerjen e krimit.
Trupat e çiftit u zbuluan të enjten në mbrëmje, kur në vendngjarje mbërritën karabinierët, policia dhe ekipet e urgjencës mjekësore. Deri më tani, nuk është bërë e ditur se kush i njoftoi autoritetet për praninë e dy trupave në banesë.
Daniele Tavoni, djali i Vincenza Gianninit nga një martesë e mëparshme, u mor në pyetje nga hetuesit që në mbrëmjen e së enjtes. Sipas rindërtimeve paraprake të hetuesve, ai dyshohet se kishte pasur konflikte të përsëritura me çiftin e moshuar për çështje ekonomike.
Tavoni është dërguar në burgun e Modenës, ndërsa Prokuroria pritet t’i kërkojë gjyqtarit kompetent të vërtetojë ligjshmërinë e ndalimit dhe të caktojë një masë sigurie. Autoritetet italiane po vijojnë hetimet për zbardhjen e plotë të një prej ngjarjeve më të rënda të regjistruara së fundmi në zonën e Modenës.