Trumpi thotë se është më e vështirë të merresh vesh me Zelenskyn sesa me Putinin

Presidenti amerikan Donald Trump ka rinisur kritikat e ashpra ndaj presidentit ukrainas Volodymyr Zelenskyt, duke thënë se është më e vështirë të merresh vesh me të sesa me presidentin rus Vladimir Putin. Trumpi i cilësoi gjithashtu si “turp” sulmet e reja të Ukrainës ndaj rafinerive ruse të naftës.

Duke folur për mediat amerikane të enjten në mbrëmje, Trump i cilësoi Zelenskyn si “turp” dhe tha se është më e vështirë të merresh vesh me të sesa me Putinin. “Siç e dini, Putini e urren Zelenskyn dhe Zelensky e urren Putinin”, tha Trump. “Dhe kur ekziston një urrejtje e tillë, është shumë e vështirë të arrihet një marrëveshje”.

Trumpi ka kritikuar gjithashtu sulmet e reja të Ukrainës ndaj rafinerive ruse të naftës, duke thënë se është një "turp" dhe se kjo është vetëm një mënyrë për të rritur çmimin e naftës në tregun botëror. “E vetmja gjë që po bën ai është rritja e çmimit të naftës në tregun botëror… Ka shumë objektiva të tjera që mund të goditen”, tha Trump.

Zelensky nuk ka reaguar ndaj kritikave të fundit të Trumpit. Ai mbërriti në samitin në Bruksel, i shoqëruar nga presidentja e Komisionit Evropian, Ursula von der Leyen, dhe presidenti i Këshillit Evropian, Antonio Costa.

“Sigurisht, ne e mbështetëm armëpushimin energjetik të propozuar nga presidenti Trump, por kemi parë se Rusia nuk e respektoi atë, as edhe për një minutë të vetme”, u tha Von der Leyen gazetarëve.

“Rusia e përshkallëzoi situatën dhe, për këtë arsye, ne duhet t’i shtojmë sanksionet ndaj Rusisë… Nuk do të heqim asnjë sanksion për sa kohë që Rusia nuk e ndal luftën”, shtoi ajo.

Moska deklaroi se nuk kishte rënë kurrë dakord për armëpushimin energjetik, të cilin Trump e kishte shpallur papritur javën e kaluar.

Agjenda e samitit të BE-së do të përqendrohet te financimi i Ukrainës dhe ndihma për ta përballuar një tjetër dimër të ftohtë – të pestin që nga nisja e pushtimit në shkallë të plotë nga Rusia, në shkurt të vitit 2022.

“Rusia po bën gjithçka për të shkatërruar infrastrukturën e energjisë dhe ujësjellësit”, i tha Von der Leyen Zelenskyt para fillimit të samitit, “por ne qëndrojmë pranë jush dhe ju mbështesim, ashtu siç kemi bërë edhe gjatë dimrave të mëparshëm”.

Zelensky tha se vendi i tij dëshiron që lufta të përfundojë “sa më shpejt të jetë e mundur”, por shtoi se Rusia nuk po jep sinjale se dëshiron të njëjtën gjë.

“Prandaj, duhet të përgatitemi për dimrin. Paketa dimërore nuk përfshin vetëm energjinë, por edhe mbrojtjen dhe financimin”, tha ai.

Komentet e Trumpit për Zelenskyn, të bëra gjatë një interviste për median amerikane Neësmax, pasqyrojnë përkeqësimin e marrëdhënieve mes SHBA-së dhe Ukrainës.

Presidenti amerikan tha se “nuk është ndonjë admirues i madh i Zelenskyt” dhe se ai “nuk është një person me të cilin është mirë të bashkëpunojmë”.

“Ai nuk dëshiron të arrijë një marrëveshje. Thotë se dëshiron marrëveshje, por në të vërtetë nuk e dëshiron”, tha Trump.

Zelensky ka zhvilluar bisedime të njëpasnjëshme me liderët e BE-së gjatë qëndrimit të tij në Bruksel. Të enjten, ai u takua me shefin e NATO-s, Mark Rutte, si dhe me liderët e Polonisë, Francës, Danimarkës dhe Belgjikës.