Turizmi ndryshon shportën e konsumit, por nuk e zëvendëson emigracionin
Turizmi ka ndryshuar peshën e konsumit për produktet e shportës ushqimore në Shqipëri, duke rritur kërkesën për produkte të gatshme, snack-e, pije freskuese dhe alkoolike. Makaronat dhe orizi mbeten produktet me peshën më të lartë të konsumit, por emigracioni dhe rritja e çmimeve vazhdojnë të ndikojnë në pakësimin e kërkesës nga konsumatori vendas.
Turizmi ka ndryshuar peshën e konsumit për produktet e shportës ushqimore në Shqipëri, duke rritur kërkesën për produkte të gatshme, snack-e, pije freskuese dhe alkoolike. Makaronat dhe orizi mbeten produktet me peshën më të lartë të konsumit, por emigracioni dhe rritja e çmimeve vazhdojnë të ndikojnë në pakësimin e kërkesës nga konsumatori vendas.
Sipas të dhënave të Doganave, për muajt janar-gusht 2026, produktet e makaronave dhe orizit kanë pasur sasinë më të lartë të importeve për gati një dekadë. Konkretisht, për periudhën janar-gusht 2026 u importua një sasi prej rreth 14 milionë kg makarona, duke rritur kërkesën me 7% krahasuar me të njëjtën periudhë të vitit të kaluar. Importet e orizit u rritën me 9% krahasuar me të njëjtën periudhë të vitit të kaluar dhe u importua një sasi prej rreth 15.4 milionë kg oriz.
Ardhja e turistëve të huaj në Shqipëri ka rritur kërkesën për produkte të gatshme, snack-e, pije freskuese dhe alkoolike. Sipas drejtuesve të supermarketeve dhe distributorëve për rrjetin retail, turistët kanë tendencë të blejnë më shumë produkte të gatshme dhe pije, ndryshe nga vendasit, që peshën kryesore të kërkesës e kanë produktet bazë ushqimore.
Në përgjithësi, turistët orientohen më shumë drejt produkteve të konsumit të menjëhershëm, ujit dhe pijeve, produkteve të freskëta, snack-eve, artikujve për mëngjes, fruta-perimeve, produkteve lokale dhe formateve të përshtatshme për qëndrime të shkurtra. Me përfundimin e sezonit turistik, tendenca i rikthehet konsumit të produkteve elementare të shportës ushqimore.
Rriten importet e drithërave dhe të sheqerit. Sipas të dhënave të Doganave, për muajt janar-gusht, u importuan rreth 131 mijë tonë grurë, duke rritur kërkesën me 5% krahasuar me janar-gusht 2025. Importet e misrit u rritën me 10% krahasuar me të njëjtën periudhë të vitit të kaluar dhe u importua një sasi prej 89 mijë tonësh misër. Rritja ka pasur edhe për importet e sheqerit, duke u importuar një sasi prej rreth 38 mijë tonësh.