Protestat në Shqipëri, të paprecedenta që nga viti 1991, demonstruesit kërkojnë dorëheqjen e kryeministrit

Protestat në Shqipëri janë të paprecedentë që nga rënia e diktaturës komuniste në vitin 1991. Demonstruesit kanë dalë në rrugët e Tiranës dhe pesë qytete të tjera të vendit, duke kërkuar largimin e kryeministrit Edi Rama dhe përmirësimin e kushteve të jetesës. Zemërimi i qytetarëve është përshkallëzuar dhe kërkesa kryesore e protestuesve është dorëheqja e kryeministrit.

Studiuesja Gresa Hasa ka lidhur këtë revoltë me pakënaqësinë e akumuluar ndër vite. “Njerëzit duan të jetojnë në një vend demokratik. Ky është rezultat i 35 viteve të frustrimit të akumuluar që nga rënia e diktaturës komuniste në vitin 1991”, shprehet ajo.

Kryeministri Edi Rama ka deklaruar se nuk do të japë dorëheqjen, duke akuzuar opozitën për nxitjen e trazirave. Megjithatë, përfaqësues të opozitës janë përballur me reagime dhe fishkëllima nga protestuesit, çka pasqyron pakënaqësinë ndaj të gjithë sistemit politik.

Shkrimtari dhe ish-ambasadori i Shqipërisë në Francë, Besnik Mustafaj, ka cilësuar zhvillimet si të paprecedenta që nga fundi i regjimit komunist. Sipas tij, përshkallëzimi është pasojë e protestave të gjata paqësore, të cilat, sipas tij, nuk kanë marrë përgjigjen e kërkuar nga autoritetet.

“Kjo dhunë është rezultati logjik i 137 ditëve protesta paqësore që nuk u dëgjuan. Njerëzit po humbasin durimin”, citohet të ketë thënë Mustafaj. Megjithatë, ai ngre shqetësimin për mungesën e organizimit dhe të një strukture përfaqësuese brenda lëvizjes, duke vlerësuar se kjo e vështirëson dialogun.