Studentët e Mjekësisë në krye të protestave, një mesazh përtej auditorëve
Studentët e Mjekësisë në Tiranë, në ditën e pestë të revoltave studentore, kërkojnë dorëheqjen e kryeministrit Edi Rama dhe largimin e qeverisë së tij.
Në ditën e pestë të revoltave studentore në Tiranë, të rinjtë vijojnë të kërkojnë dorëheqjen e kryeministrit Edi Rama dhe largimin e qeverisë së tij. Studentët e Mjekësisë renditen në krye të protestës, duke marshuar të parët nga dyert e Universitetit për tek Ministria e Arsimit. Kjo nuk është hera e parë që studentët e Mjekësisë janë në krye të një lëvizjeje studentore. Edhe në vitin 2018, ata u bënë pjesë e protestave që tronditën universitetet dhe çuan në mobilizimin e mijëra studentëve.
Fakti që Mjekësia prin e para në krye të protestës nuk është rastësi. Kjo mund të lidhet me qasjen ndryshe të tyre ndaj realitetit, lidhet me ndjeshmërinë ndaj drejtësisë, kontaktin e përditshëm me qytetarët dhe janë ata të parët që shohin vështirësitë e njerëzve. Mjekësia nuk përballet vetëm me sëmundjet, por edhe me pasojat e pabarazisë, mungesës së mundësive dhe problemeve që prekin drejtpërdrejt qytetarët.
Prania e studentëve të Mjekësisë në krye të revoltës mund të shihet edhe si një mesazh përtej auditorëve, të rinjtë nuk duan të jenë vetëm spektatorë të zhvillimeve politike, por kërkojnë të kenë zë në vendimet që përcaktojnë të ardhmen e tyre. Në ditën e pestë, kërkesa e tyre mbetet politike dhe e qartë, dorëheqja e Edi Ramës dhe largimi i qeverisë. Fakti që studentët vijojnë të dalin në rrugë tregon se pakënaqësia e tyre kërkon përgjigje.