Protesta në Durrës, disa të arrestuar dhe sinjalistikë e shkatërruar

Disa persona janë arrestuar në Durrës, në vijim të protestës së të rinjve që po zhvillohet prej disa ditësh në qytetin bregdetar. Studentë dhe protestues janë mbledhur sërish në rrugët e qytetit, ku kanë nisur marshimin. Gjatë protestës, një pjesë e tyre kanë djegur kosha mbeturinash dhe kanë dëmtuar sinjalistikën rrugore vertikale. Tensionet vijnë pas protestës së së premtes, kur studentët u mblodhën para Drejtorisë së Policisë në Durrës, duke kërkuar lirimin e shokëve të tyre të shoqëruar në komisariate pas incidenteve gjatë tubimit. Gjatë protestës, të rinjtë u bënë thirrje edhe punonjësve të Policisë që të heqin uniformat dhe t’u bashkohen atyre, me argumentin se qeveria, të cilën e akuzojnë për korrupsion, po i vendos përballë fëmijëve të tyre.