Policia ndalon dy persona të dyshuar për ngjarje të ndryshme kriminale me armë zjarri në Tiranë

Policia e Tiranës ka ndaluar dy persona të dyshuar për ngjarje të ndryshme kriminale me armë zjarri. Njëri prej tyre dyshohet se ka qëlluar në drejtim të një servisi pranë mbikalimit të Kasharit në shtator, ndërsa tjetri akuzohet për plagosjen me armë zjarri të një 54-vjeçari.

Njëri prej tyre, V. T., 30 vjeç, i dyshuar se në bashkëpunim me persona të tjerë ende të paidentifikuar ka qëlluar me armë zjarri në drejtim të një servisi pranë mbikalimit të Kasharit, më 10 shtator 2026.

Në një tjetër rast, shërbimet e Komisariatit të Policisë Nr. 3 Tiranë, në bashkëpunim me Komisariatin e Policisë Kavajë, finalizuan operacionin policor të koduar “Gjurmimi”. Gjatë operacionit u kap dhe u ndalua shtetasi S. D., 33 vjeç, i shpallur në kërkim për veprat penale “Plagosja e rëndë me dashje” dhe “Mbajtja pa leje dhe prodhimi i armëve, armëve shpërthyese dhe i municionit”. Ai dyshohet se më 14 tetor 2026, në rrugën “Kadri Prishtina”, ka plagosur me armë zjarri në këmbë shtetasin G. A., 54 vjeç. Materialet procedurale për të dyja rastet i janë referuar Prokurorisë për veprime të mëtejshme.