LIVE/ Dita e pestë e protestës! Përshkallëzohet situata te Ministria e Arsimit, policia qëllon me plumba gome. Ndërhyn edhe ambulanca
Protestat në Shqipëri vazhdojnë të përshkallëzojnë, me situata të rrezikshme në Tiranë dhe në qendër të tyre, Ministria e Arsimit. Protestuesit kanë paralajmëruar grumbullimin e tyre në këtë vend, ndërsa policia është pozicionuar në terren për të menaxhuar situatën.
Sot mbahet dita e pestë e protestave që kanë përfshirë Tiranën dhe qytete të tjera të vendit. Vëmendja është përqendruar sërish te Ministria e Arsimit, aty ku protestuesit kanë paralajmëruar grumbullimin e tyre, ndërsa pritet që në këtë mobilizim t’u bashkohen edhe shqiptarë nga diaspora.
Protesta e sotme vjen pas katër ditësh të shoqëruara me tensione, përplasje mes protestuesve dhe policisë, si dhe dëmtime të institucioneve publike dhe bizneseve në kryeqytet. Në terren janë pozicionuar forcat e policisë, ndërsa pranë Ministrisë së Arsimit janë vendosur edhe autobotet, në kuadër të masave të marra për menaxhimin e situatës.
Ndërkohë, godina e Ministrisë së Arsimit vijon të jetë e dëmtuar nga incidentet e ditëve të mëparshme. Protestat nisën të martën, fillimisht me bojkotimin e mësimit nga nxënës dhe studentë, por më pas u përshkallëzuan, duke u shtrirë edhe në qytete të tjera të vendit.
Protestuesit shprehin pakënaqësinë ndaj qeverisë dhe kërkojnë dorëheqjen e kryeministrit Edi Rama, ndërsa në qendër të revoltës janë edhe akuzat për korrupsion dhe kërkesat për ndryshime në arsim. Përditësimi orë pas ore i të gjitha zhvillimeve të ditës së sotme, 17 tetor 2026, përgatitur nga gazetarët e redaksisë së Top Channel Web, raportuar nga gazetarët e Top Channel në terren, Anila Hoxha, Elda Menga, Kristi Gongo dhe Dorjana Bezat, dhe korrespondentët tanë në rrethe, po ashtu edhe nga gazetaret e Top News në terren, Kleida Muka, Geriola Hate dhe Sagita Kumria.
Momenti kur qëllon live drejt protestuesve me plumb gome, disa prej kolegëve të pajisur me armët e posaçme.