Protesta studentore në Bruksel: Gaz dhe ujë me presion, policia përballë trazirave
Protesta studentore në Bruksel, Belgjikë, u shndërrua në trazira pasi policia përdori gaz dhe ujë me presion për të rivendosur rendin.
Disa qindra persona, kryesisht të rinj, protestuan sot në Bruksel, ku disa prej tyre u përplasën me policinë, në një situatë trazirash të frymëzuara pjesërisht nga demonstratat në Francën fqinje. Grupet studentore belge kanë deklaruar se po protestojnë kundër rritjes së kostove të arsimit dhe reformave, për të cilat druhen se do ta bëjnë arsimin e lartë më pak të qasshëm.
Demonstruesit u mblodhën në qendër të Brukselit; shumë prej tyre mbanin maska dhe thërrisnin slogane antifashiste. Sipas një dëshmitari policia përdori gaz lotsjellës dhe ujë me presion, ndërsa disa protestues përmbysën një makinë.
Ministri i Brendshëm belg, Bernard Quintin, shkroi në platformën X se “ajo që po ndodh në Bruksel nuk është më thjesht një protestë” dhe se “do të përdoren të gjitha mjetet e nevojshme për të rivendosur rendin përballë trazirave”. Një protestë u zhvillua gjithashtu në qytetin lindor të Liezhit, ku studentët demonstruan më herët gjatë këtij muaji lidhur me sistemin arsimor në gjuhën frënge, duke përmendur rritjen e kostove të arsimit dhe vështirësitë në qasjen ndaj materialeve të studimit.
Trazirat në Francë nisën muajin e kaluar si protesta për financimin e arsimit dhe kushtet në shkolla, për t’u shndërruar më pas në një lëvizje më të gjerë që përqendrohet te pabarazia, shpenzimet publike dhe standardet e jetesës.