Rama: Protesta në Tiranë është një sfidë për të ardhmën e Shqipërisë në BE

Kryeministri Edi Rama ka reaguar për protestën që prej pesë ditësh po zhvillohet në Tiranë, duke deklaruar se është përpjekur të shmangë përshkallëzimin e situatës dhe të mos bjerë në atë që e cilëson si “kurthi i dhunës që kërkon gjak”.

Në reagimin e tij, Rama u ndal te zhvillimet e protestës dhe bëri një paralelizëm me ngjarjet e 21 janarit, duke kujtuar viktimat dhe të plagosurit gjatë asaj dite. “Ja ku jam, nuk kam ikur. Vendosa të jem këtu sot, të shihni në sy dhe të përpiqem të them gjërat e mia”, u shpreh Rama, duke shpjeguar se gjatë ditëve të fundit kishte zgjedhur të mos përfshihej drejtpërdrejt, por të ndiqte me durim zhvillimet.

Kryeministri theksoi se, sipas tij, situata aktuale duhet parë edhe në kontekstin e historisë së protestave në bulevardin e kryeqytetit. “Unë e di historinë e këtij bulevardi, e njoh mirë, i kam ende të freskëta në kujtesë ato që ndodhën në 21 janar”, deklaroi Rama.

Ai kujtoi se gjatë protestës së 21 janarit 2011 u vranë katër protestues me armë zjarri dhe u plagosën dhjetëra të tjerë. Rama krahasoi atë që ndodhi atëherë me situatën e tanishme, duke theksuar se, sipas tij, gjatë ngjarjeve të sotme nuk janë përsëritur të njëjtat rrethana.