Policia zbraps protestuesit në Tiranë, pas tensioneve të shpeshta
Protesta e shtunën e 18 tetorit në Tiranë u zhvillua në një situatë të tensionuar, pasi policia zbrapsi protestuesit në qendër të qytetit.
Policia ka zbrapsur protestuesit në qendër të Tiranës, pas tensioneve të shpeshta që kanë shoqëruar ditën e gjashtë të tubimeve kundër qeverisë. Forca të shumta policore, autobotë dhe furgonë janë vendosur pranë sheshit "Skënderbej", në zonën e njohur si "te Banka".
Efektivi i policisë ka përdorur ujë nga autobotët për të shpërndarë turmën, ndërsa pranë Ministrisë së Arsimit janë arrestuar disa persona. Numri i saktë i të arrestuarve dhe arsyet e arrestimit të tyre nuk janë bërë ende të ditura.
Protesta e kësaj të dielë, 18 tetor, nisi rreth orës 12:30 para Ministrisë së Arsimit. Ndryshe nga ditët e mëparshme, tubimi filloi me këngë dhe valle, por më pas situata u tensionua dhe u regjistruan sulme me gurë dhe përplasje me policinë.
Gjatë incidenteve u lëndua edhe gazetarja Elira Kadriu, e cila u godit me gur në pjesën e legenit dhe u transportua me ambulanca për ndihmë mjekësore.
Forcat e rendit kanë përdorur gjithashtu gaz lotsjellës, ndërsa gjatë protestës janë raportuar edhe shoqërime në policinë.
Tubimi zhvillohet pas pesë ditësh protestash të shoqëruara me incidente të dhunshme në kryeqytet. Të shtunën, përplasjet u përshkallëzuan me hedhjen e gurëve, koktejve Molotov dhe mjeteve piroteknike, ndërsa policia ndërhyri për të shpërndarë protestuesit.