Protestuesit marshojnë drejt Zogut të Zi, pas përpjekjeve të policisë për shpërndarje

Protesta kundër qeverisë së Edi Rames ka marrë një tjetër drejtim në ditën e gjashtë. Turma e demonstruesve është zhvendosur në Unazën e Tiranës dhe po marshon drejt Zogut të Zi, pas një serie përpjekjeve të policisë për shpërndarje në qendër të kryeqytetit.

Lëvizja vjen pas tensioneve në dalje të Rrugës së Durrësit, ku policia përdori gaz lotsjellës, ndërsa studentët hodhën gurë dhe fishekzjarë në drejtim të efektivëve.

Më pas, forcat e policisë ndoqën protestuesit që u zhvendosën drejt Bulevardit “Zogu i Parë”. Tashmë turma ka ndryshuar sërish itinerar, duke u drejtuar nga Unaza drejt Zogut të Zi.

Gjatë ditën e sotme, demonstruesit kanë marshuar në disa prej aksve kryesore të Tiranës, ndërsa policia ka ndërhyrë vazhdimisht për shpërndarjen e tyre. Në Bulevardin “Dëshmorët e Kombit”, forcat e rendit përdorën tre automjete ujëhedhëse dhe gaz lotsjellës, ndërsa gjatë përpjekjeve protestuesit rrokullisën blloqe betoni drejt policisë.

Zhvendosja e fundit drejt Zogut të Zi e shtrin protestën përtej qendrës së kryeqytetit, pas disa orësh tensionesh dhe ndërhyrjeve policore.

Pavarësisht përpjekjeve dhe ndërhyrjeve të policisë për shpërndarjen e turmës, protestuesit vijojnë marshimin dhe kërkesën për dorëheqjen e kryeministrit Edi Rama.

Në ditën e gjashtë, protesta po lëviz nga një aks rrugor në tjetrin, ndërsa demonstruesit po marshojnë drejt Zogut të Zi.